Поранешниот гемански репрезентативец Лотар Матеус откри интересни детали околу сагата за потписот на тренерот Томас Тухел.
Германскиот стратег Томас Тухел минатата недела седна на клупата на минхенски Баерн откако клубот му врачи отказ на Јулиан Нагелсман. Да не се случеше тоа, Тухел најверојатно кариерата ќе ја продолжел во Италија, тврди легендарниот Лотар Матеус.
Поранешниот капитен на репрезентацијата на Германија, кој 4 сезони мина играјќи во Италија за Интер (1988-1992), изнесе тврдења дека актуелниот тренер на баварскиот тим бил во сериозни преговори со еден италијански клуб.
„Томас сакаше да работи веќе од лето и беше подготвен да преземе еден голем италијански клуб. Според информациите што ги имам, двете страни биле во сериозни преговори, но тогаш се појавил Баерн и сѐ застанало“, рече Матеус за германските медиуми.
Иако не сакаше да го открие името на клубот, тамошните медиуми шпекулираат дека Матеус мислел на неговиот поранешен тим Интер и тоа поради две причини. Прво, Матеус 4 години настапуваше за клубот од Милано и сѐ уште има добри контакти внатре во овој тим, а како второ, како што минува времето сѐ повеќе на Чизмата се зборува дека Симоне Инѕаги на крајот од сезоната ќе се раздели со „Нераѕурите“ поради слабите игри и резултати што неговиот тим ги остварува сезонава во Серија А. Двегодишниот договорот на Инѕаги со Интер истекува во јуни.
