Германскиот производител на автомобили Mercedes-Benz повлече речиси милион постари модели поради потенцијални проблеми со системот за сопирање.
Во текот на викендот, компанијата соопшти дека ќе контактира со сопствениците на автомобили бидејќи сопирачките на нивниот автомобил може да бидат засегнати од „напредна корозија“. Повлекувањето се однесува на 993.407 автомобили, од кои 70.000 се наоѓаат во Германија. Mercedes повлече сличен број автомобили минатата година поради безбедносен проблем со системот за итни повици.
Овој пат повлекувањето се однесува на автомобилите произведени помеѓу 2004 и 2015 година, а тоа се теренците ML и GL, како и R-Class.
Од Mercedes изјавија дека силното сопирање може да резултира со механичко оштетување на системот за сопирање токму поради споменатата корозија.
Процесот на повлекување на возилото вклучува проверка и замена на делови доколку е потребно.
Mercedes во февруари повлече повеќе од милион автомобили поради дефект на системот eCall, кој ги известува службите за итни случаи за несреќата и ја пренесува локацијата на возилото. Поради дефектот беше можно да се испрати погрешна локација. Меѓутоа, во овој случај, проблемот беше решен главно со безжична over-the-air надградба.