Чудно и невообичаено, Меси синоќа истрча во клупски дрес поинаков од оној на Барселона и дебитираше во француската Лиг 1 за тимот на ПСЖ.
Пари Сен-Жермен синоќа гостуваше кај тимот на Рамс, а стадионот „Огист Делон“ ќе остане запишан како локација каде Лео Меси прв пат заиграл за „Светците“.
Агентинецот почна од клупата и во игра влезе во 66. минута на местото на Нејмар. Резултатот тогаш веќе беше 2:0 за неговиот нов тим, а на крајот се покажа и како конечен. Кога Меси излезе на терен друштво во нападот му правеа Анхел Ди Марија и Килјан Мбапе.
Меси имаше мирно и речиси незабележливо деби. Победникот веќе беше одлучен, а Меси и онака е вон форма и ќе му треба време.
„Беше солиден. Среќен сум што дебитираше. Тоа беше важно за него. Далеку е од неговата најдобра форма, но тренира добро. Ќе биде подобар по репрезентативната пауза. Од него го очекуваме најдоброто“, рече тренерот Маурисио Почетино.
Меси дојде во ПСЖ на почетокот од август и нема одиграно официјален натпревар од финалето на Копа Америка на 11 јули кога со Аргентина го победи Бразил и стана континентален шампион. Скоро имаше и мала повреда.
После паузата ПСЖ на домашен терен го пречекува новакот во лигата Клермон, кој по четири кола изненадувачки е трет и непоразен. Меси е во составот на Аргентина за претстојните мундијалски квалификации против Венецуела, Бразил и Боливија.
