Милан се подготвува да го заврши трансферот на Косоваре Аслани, шведска напаѓачка родена 1989 година, која последните две години играше за Реал Мадрид и која наскоро ќе потпише договор со „Росонерите“.
За еден месец ќе наполни 33 години, а во Шведска ја сметаат за „женскиот Ибра“. Како и Златан Ибрахимовиќ, и таа игра како напаѓач. Родена е во шведскиот град Кристијанстад, а има косовско-албанско потекло. На зглобот има дури и истетовиран албански орел.
Како дете ѝ било предодредено во Шведска да избира помеѓу хокеј на мраз и фудбал, но се одлучила за најважната споредна работа на светот - и била во право бидејќи играше за клубови како ПСЖ, Манчестер Сити и Реал Мадрид.
Со Шведска, Аслани освои два олимписки сребрени медали, европска бронза и светска бронза. Нејзината тајна е тренингот, особено тренирањето на горниот дел од телото. Со оглед на тоа што има многу мускулести нозе, посебно внимание посветува на останатиот дел од телото за постојано да биде во рамнотежа.
Таа е нетипичен напаѓач, всушност не игра само како центарфор, туку е играч со голема брзина и забрзување. Една од нејзините главни карактеристики е брзиот спринт со топка.
Косоваре Аслани важи за ѕвезда во Шведска, иако е многу горда на своето албанско и косовско потекло. Затоа е многу посветена на борбата против расизмот и борбата за родова еднаквост.
Аслани исто така се бави и со мода. Позира за големи брендови, учествува во разни документарни филмови, а кога ќе престане да игра фудбал, веројатно ќе се проба на ТВ.
