По низата шпекулации за мистериозен проект на актерот Арнолд Шварценегер, познато е дека станува збор за реклама која ќе биде прикажана на Супер бол настанот идниот викенд.
BMW објави реклама која ќе биде прикажана на Супер бол, а во неа се појавуваат холивудските актери Арнолд Шварценегер и Салма Хајек во улоги на грчкиот бог Зевс и божицата Хера.
Двајцата уживаат во Палм Спрингс, Калифорнија, но кога на Зевс ќе му стане досадно им помага на соседите и другите луѓе со нивните „електрични“ проблеми. Од друга страна, Хера ужива во пензионирањето, но ги препознава проблемите на сопругот. Токму затоа му купува BMW iX, за да го расположи малку.
Рекламата е снимена за промоција на електричниот модел iX, а во неа се појавува моделот xDrive50. Овој модел има два електрични мотори кои развиваат 516 КС и 764 Nm, а тука е и батеријата од 111,5 kWh. Дометот изнесува меѓу 491 и 521 километар.
Во понудата ќе се најде и моделот iX M60, со 610 КС.
