Пред да продолжите кон текстот и сликите да ве предупредиме: Доколку сте арахнофоб, односно имате фобија од пајаци - не го читајте ова.
Кога ќе дојде погодно време десетици илјади мали пајаци ткаат километарска мрежа покрај брегот на грчкото езеро Вистонида.
Биолозите велат дека оваа појава, иако ретка, не е непозната. Ја предизвикува невообичаено топлото време кога се зголемува бројот на муви и комарци.
А, тоа е рај за пајаците.
„Тие се размножуваат неверојатно бидејќи имаат многу храна“, вели локалниот биолог Еутерпе Патесини.
Исткаени над грмушки, ниска вегетација и огради, силните бели мрежи се долги околу илјада метри.
Пајаците се од родот Tetragnata, познати по нивните долги, издолжени тела. Живеат во близина на водни живеалишта, а се вели дека некои видови можат да одат по вода.
Мрежата се повлекува и исчезнува постепено со доаѓањето на постудените и поврнежливи денови.
