Тренерот на Рома воочи вечерашното гостување во Хелсинки во рамките на 5. коло од Лига Европа се осврна на подлогата на која треба да играат неговите избраници.
„Против Хелсинки го имаме истиот проблем каков што имавме против Боде/Глимт, бидејќи и двата играат на вештачка трева. Играњето на вештачка трева не е фудбал, туку некој друг спорт. Ни треба победа, нема да биде лесно. Не дојдовме овде на излет“, рече Жозе Мурињо.
По четири одиграни кола Рома е само трета во Ц групата со 4 бода, прв е Реал Бетис со 10, втор Лудогорец со 7, а последен токму нивниот денешен противник - ХЈК со само 1 освоен бод.
„На колегите во Рим им реков дека станува збор за добро организирана екипа. Овде се има случено револуција. Порано имаа само добри поединци, а сега имаат и добри екипи. Сакаме да останеме во ова натпреварување, не сакаме да ја браниме титулата во Конференциската лига, туку да продолжиме во Лига Европа“, додаде португалскиот стратег алудирајќи на тоа дека ако Рома заврши трета ќе се пресели во пониското натпреварување, кое лани го освои.
Натпреварот помеѓу ХЈК и Рома се игра вечерва од 21 часот на „Болт Арена“ стадионот во главниот град на Финска. Во првиоот дуел во септември во Рим тимот на Мурињо славеше со убедливи 3:0.
