По новиот скандал поврзан со Кајри Ирвинг, Бруклин Нетс имаат намера да започнат делумна обнова на тимот.
Кајри Ирвинг беше суспендиран на најмалку 5 натпревари поради јавно промовирање на книга поврзана со антисемитизам, а потоа не се извини. Не само што не покажа каење, туку и продолжи да ги брани своите ставови. На крајот дојде извинување, но само кога лигата се сврти против него. Нетс го суспендираа до понатамошно известување, а неговото враќање на паркетот ќе зависи од неговите понатамошни чекори во форма на дејствија кон еврејската заедница во Бруклин.
Ирвинг потоа беше критикуван од лидерите на НБА и некои од најголемите ѕвезди, како Леброн Џејмс. И се чини дека на сопственикот на Нетс, Џо Цаи, конечно му дојде преку глава од постојаното справување со проблемите што ги создава Ирвинг. Минатата година тој го пропушти поголемиот дел од сезоната затоа што одби да се вакцинира, претходно се истакна по своите теории на заговор за рамна земја, а на капак беше неодамнешната промоција на идеите на контроверзниот десничар и познат теоретичар на заговори. Алекс Џонс.
Договорот на Ирвинг вреден 37 милиони долари годишно истекува следното лето, а според американските медиуми поврзани со Нетс, клубот преку трејд ќе се обиде што поскоро да се ослободи од Ирвинг.
Слична судбина може да го снајде и Кевин Дурент, близок пријател на Ирвинг. На почетокот на летото, Дурент побара трејд од Нетси и покрај тоа што потпиша нов повеќегодишен договор минатата година, а потоа го повлече барањето. Меѓутоа, бидејќи Дурент и Ирвинг се блиски пријатели, а Нетс не ја отвори добро сезоната, НБА тимовите ги реактивираа преговорите за трејдот поврзан со Дурент.
Нетс неодамна му врачи отказ на тренерот Стив Неш, а многу брзо требаше да го ангажираат Име Удоку, до неодамна тренерот на Бостон Селтикс, кој во средината на септември беше суспендиран на една година поради недолично однесување кон жените вработени во клубот. По критиките на медиумите, Нетс нагло се откажаа од тие разговори, иако тоа не значи дека и онака нема да го ангажираат Удоку.
Бруклин Нетс моментално има скор 4-6 и е на 10-тото место во Источната конференција.
