Откако Рома синоќа загуби со 2:0 во Фиренца, Жозе Мурињо анализирајќи го натпреварот зборуваше само и единствено за ВАР.
На уморната Рома, по избореното финале во Европа конференциската лига во четвртокот, не ѝ помогна ниту поместувањето на натпреварот за в понеделник, па „Џалоросите“ практично и не одиграа ништо во Фиренца и по само 11 минути игра веќе губеа со 2:0. Но, Мурињо успеа да најде друг виновник, надвор од неговиот тим.
Проблем за Мурињо е пеналот досуден во 5. минута и тоа по интервенција на ВАР откако главниот судија Марко Гуида, кој патем беше блиску, оцени дека нема доволен контакт за прекршок. Аргентинецот Николас Гомсалес успешно го реализираше за водство од 1:0 кое само 6 минути подоцна Виола го дуплираше преку Џакомо Бонавентура.
„Објаснување... па ние чекаме објаснување веќе долго време и сѐ уште немаме објаснување. За овој натпревар има двојно објаснување. Очигледно е дека по четврточниот натпревар ни недостасуваше физичка и ментална енергија, споредено со екипа која имаше цела недела за да се подготвува“, почна Мурињо.
„Но, јас сакам да чујам објаснување од г-дин Банти од Ливорно, кој не е далеку оттука. Веќе ја видов снимката, има допир, но нема фаул. Судијата беше блиску и не досуди пенал. Во ВАР собата г-дин Банти интервенираше“.
Станува збор за судијата Лука Банти кој ја предводеше ВАР собата на овој натпревар.
„Покрај пеналот, Фиорентина беше посилна, играа со друго темпо и концентрација, така што ја заслужија победата. Проблемот е тоа што не зборувам само за овие три бода, но за многуте, многуте инциденти за кои немаме објаснување. Зошто ВАР повика судија како Гуида кој беше на оддалеченост од 10 метри и сѐ убаво виде дека нема пенал? Зошто? Тоа се објаснувањата кои ги сакаме, а ги немаме“.
Со овој пораз Рома сега има 59 бодови, исто колку и Фиорентина и Аталанта, а 3 помалку од Лацио. Овие 4 екипи водат борба за трите места кои водат во Европа, две во Лига Европа и едно во Конференциската лига. Рома има и џокер во ракавот бидејќи е во финалето на Конференциската лига против холандски Фејнорд, која доколку ја освои автоматски ќе добие место во Лига Европа.
„Да, ние сме во финалето, што апсорбира емоции и енергија од клуб како Рома, но ние имаме и лигашки натпревари за играње и богами, премногу е. Она што му се случува на овој тим е навистина премногу“, се жали португалскиот стратег.
Мурињо од новинар на прес-конференцијата доби интересно прашање за тоа зошто Фиорентина повеќе и полесно напаѓаше притоа правејќи многу вертикални додавања за разлика од Рома која упорно се движеше хоризонтално.
„Многу е едноставно. Пред 12 месеци Залевски веројатно ќе беше на клупа на младиснкиот тим. Сега игра 9 натпревари по ред вклучувајќи и полуфинале од европско натпреварување. Разликата кога се игра вертикално е разлика за 14 натпревари кои Рома ги одигра повеќе од Фиорентина сезонава. Ако трчаме 10 километри по натпревар, 14 натпревари се многу. Тоа е разлика на интензитет и недостаток од интензитет, концентрација и недостаток од концентрација. Многу е едноставно“, објаснува Мурињо, земајќи го за пример 20-годишниот Никола Залевски.
На крајот, повторно им се обрати на ВАР судиите:
„Знаеме дека ја имаме почитта од навивачите на Рома, но ние ја сакаме и почитта од луѓето како Банти, кои седат во нивните удобни столици и досега ни одзедоа многу, многу бодови“.
