Жозе Мурињо си замина без да има време како човек да се прости од навивачите на Рома. Во вторникот клубот брзо реши да го замени и потоа уште побрзо му најде замена во Даниеле де Роси, а Португалецот мораше да ги спакува куферите и да го напушти „Олимпико“.
При неговото заминување од клубот, некои навивачи го пресретнаа автомобилот во кој се наоѓаше и го скандираа неговото име и со тоа му дадоа поддршка на тренерот кој на овој клуб му го донесе единствениот европски трофеј во историјата - титулата во Европа конференциската лига пред две години. Од објавените видеа се гледа дека Португалецот во таа прилика за малку не заплака.
Мурињо ја немаше вообичаената прес-конференција, ниту разговараше со италијанските новинари, туку се обрати до јавноста преку социјалните мрежи.
Сега веќе екс тренерот на клубот од Рим објави серија свои фотографии од времето во Рома и со нив остави коментар:
„Пот, крв, солзи, радост, тага, љубов, браќа, историја, срце, вечност“.
Жозе Мурињо дојде во Рома во мај 2021 година и оттогаш го предводеше поранешниот шампион на Италија на 138 официјални натпревари на кои забележа 68 победи, 39 порази и 31 нерешена.
Клубот од главниот град на Италија моментално се наоѓа на разочарувачкото деветто место на табелата во Серија А со само 29 освоени бодови од 20 одиграни натпревари. Лошиот пласман, како и испаѓањето од Копа Италија од лутиот ривал Лацио се причините за разделбата со Мурињо.
