Септември е месец во кој имаме огромен избор на овошје и зеленчук. По опуштеноста од годишниот одмор, многумина сакаат да го прочистат организмот па овие намирници се совршени за тоа.
По жешките летни денови можеме да уживаме во сочниот вкус на грозјето кое е богато со хранливи состојки. Освен природен шеќер, содржи влакна и витамин Ц. Но, најмногу се истакнува по антиоксидансите. Ресвератрол е најпознатиот, а неговата способност за неутрализација на слободните радикали е поврзана со поголема кардиоваскуларна и антиканцер заштита.
Ако го јадете со лушпа, може подобро да ги искористите антиоксидансите и да добиете повеќе влакна, а тоа го ублажува запекот и го поттикнува организмот на чистење од токсини.
Крушката особено се препорачува на оние кои страдаат од хипертензија, бидејќи е богата со калиум и голема количина вода, па делува како диуретик. Присутноста на влакна и флавоноиди е поголема во кората на крушката отколку во месото.
Почнува и сезоната на јаболка. Иако во текот на годината може да најдеме различни сорти на пазарите и по продавниците, тие сега почнуваат природно да созреваат и имаат подобар вкус. Јаболката се богати со витамин Ц, а киселините и солите во нив дејствуваат антисептички, будат апетит и помагаат во подобрување на дигестијата како и во одржување на оралната хигиена.
Содржат пектин кој ја штити бактериската флора и помага во намалување на количините на холестерол.
Праските се лесен лаксатив и диуретик, овозможуваат три витамини кои го одлагаат стареењето. Една праска овозможува околу 33% од дневната потреба на витамин Ц, 15% витамин А и 10% витамин Е.
Боровинките имаат антиоксидативен ефект, го подобруваат имунитетот. Богати се со железо, фолна киселина и витамин Ц. Особено се корисни за оние кои страдаат од анемија.
Зелката е меѓу првите намирници кои можат да се јадат свежи во есенските и зимските салати и можат да се скиселат со што се добива совршен пробиотик корисен за цревната флора. Богата е со витамини Ц и Е, како и од групата Б особено фолна киселина. Исто така обезбедува калциум во облик кој телото лесно го апсорбира.
Печурките овозможуваат солидна доза на селен и витамин Д. Селенот и другите антиоксиданси го штитат телото од оштетување на клетките.
Како што се ближи есента, празот се дебелее и вкусот му е поинтензивен. Идеална намирница е за ова време од годината. Исто како лукот и кромидот, празот изобилува со сулфурни соединенија кои ги подобруваат имунитетот и циркулацијата.