Манекенката Наоми Кембел за прв пат ја покажа својата ќерка, родена во мај минатата година.
Славната манекенка позираше со ќеркичката во прегратка за британското издание на Vogue.
„Детето не е посвоено, таа е моја биолошка ќерка“, соопшти 51-годишната Наоми во интервјуто. „На прстите од една рака може да се изброи колку луѓе знаеја дека ќе добијам дете. Таа е најголемиот благослов што можев да го добијам“, вели таа.
Наоми не откри кој е таткото на нејзиното дете, а околу целата работа е многу таинствена и во интервјуто, пишува магазинот People.
Претходно се шпекулираше дека детето е родено од сурогат-мајка, но таа тоа никогаш не го потврди, ниту го негираше.
Еден месец пред да објави дека има ќерка, Наоми прошета на модна писта и тогаш не беше бремена, па сите беа изненадени од веста дека стана мајка. Манекенката потенцира дека мајчинството е најдобрата работа што ја има доживеано во животот.
На насловната страница за мартовското издание на Vogue стои цитат од интервјуто со Наоми.
„Отсекогаш знаев дека еден ден ќе имам дете“.
