Андреа Пирло и челниците на „Старата дама“ се на жесток удар од страна на навивачите откако синоќа тимот доживеа срамен пораз на домашен терен од малиот Беневенто.
Јувентус сега има заостанување од цели 10 бодови зад лидерот Интер и полека, но сигурно, првпат по 9 години ја губи битката за титулата откако го запиша четвртиот пораз сезонава. Беневенто вчера славеше среде Торино благодарение на единствениот погодок на Адолфо Гајч.
„Старата дама“ сезонава го освои италијанскиот Суперкуп, а се пласираше и во финалето од Копа Италија, но испадна од Лигата на шампионите уште во осминафиналето од Порто, а Скудетото речиси го загуби.
Навивачите по социјалните мрежи најмногу го криват неискусниот стратег Андреа Пирло, како и управата која буквално го фрли в оган кога летоска му ја довери задачата да предводи голем клуб како Јуве.
Директорот на клубот, Фабио Паратичи, уверува дека Пиорло сепак останува на клупата бидејќи е дел од стратегијата на клубот која гледа долгорочно. Воедно, објави и дека нема да си замине ниту Кристијано Роналдо кој е незадоволен од новото испаѓање од Лигата на шампиони.