Огромна загуба за македонската фудбалска репрезентација која на претстојното, и за нас историско, Европско првенство дефинитивно ќе настапи без напаѓачот Илија Несторовски.
Популарниот НестоГол го повреди коленото на тренинг за својот Удинезе и стравувањата се потврдија на вчерашните прегледи по што стана јасно дека ќе мора да му биде направен хируршки зафат на лигаментите.
Несторовски преку својот профил ѝ се обрати на јавноста потврдувајќи ги лошите прогнози:
„Жал ми е, но сум подготвен да станам и да се борам. За жал, оваа повреда нема да ми дозволи да играм на Европското првенство со Македонија, на што бев многу желен. Но, ќе дадам сѐ од себе и ќе го победам овој предизвик да се вратам посилен од порано. Сакам да им се заблагодарам на моето фантастично семејство, на соиграчите, пријателите и навивачите кои ми напишаа и ме натераа да се чувствувам сакан повеќе од кога било во ова тешко време. Благодарност и до професорот Мариани и неговиот тим. Патот е тежок, но јас сум подготвен“.
Ова е голем удар не само за Несторовски, кој е еден од најзаслужните што Македонија ќе игра на ЕУРО, туку и за селекторот Игор Ангеловски кој го загуби првиот избор во нападот.
Тој е еден од најискусните во репрезентација со 46 одиграни натпревари, а има и постигнато 10 голови. Репрезентативец е од октомври 2015 кога дебитираше на ЕУРО 2016 квалификацискиот натпревар против Украина.