Новата сезона во НФЛ лигата за тимот на Филаделфија Иглс ќе започне од Бразил, односно во градот Саун Пауло, најави комесарот на натпреварувањето Роџер Гудел.
Натпреварот е предвидено да се игра во петок, на 6 септември 2024, што ќе биде првпат во последните 50 години отворањето на ова натпреварување да се игра во петок.
„Убедени сме дека американскиот фудбал може да стане глобален спорт за многу краток временски период. Со задоволство можам да објавам дека овој натпревар ќе се игра во Бразил, бидејќи тоа е одлична можност да го промовираме нашиот спорт“, рече Гудел.
Сѐ уште не е познато кој тим ќе им биде ривал на „Орлите“ ден по официјалниот почеток на лигата, но едно е сигурно дека натпреварот ќе биде запишан како играчите на Филаделфија да го одиграле на домашен терен.
Американските медиуми пренесуваат дека во Бразил има исклучително силна база од 58 милиони љубители на американскиот фудбал и затоа е одлучено натпреварот да се игра токму во оваа земја.
Натпреварот ќе се игра на стадионот „Неу Кимика Арена“ на Коринчјанс, кој може да прими 49.205 навивачи, а каде се одиграа и натпревари од Мундијалот во 2014 година кога домаќин беше Бразил и тоа и отворањето меѓу Бразил и Хрватска.
НФЛ натпревари веќе се одиграа во Англија и Германија, а следна дестинација, според американските медиуми, би можела да биде Шпанија, која во текот на 2025 година е планирано да биде домаќин на играчите од НФЛ.
