Се чини дека Netflix навистина имаат слух за тоа што сака нивната публика. А понекогаш знаат да изненадат со производ кој не ни знаевме дека ни треба, ама откако ќе го видиме, не можеме без него.
Легендарниот Николас Кејџ прави камбек на малите екрани после многу долго време и тоа со серија во која го игра Џо Егзотик. Контроверзниот сопственик на зоолошка градина гледачите веќе го знаат од документарниот серијал на Netflix за кој постојано се зборува на социјалните мрежи – „Tiger King".
Иако Џо лично сакал неговиот лик да го игра Бред Пит или Дејвид Спејд, продуцентите сепак се одлучиле за Кејџ, според Variety, кој прв ја објави веста.
Приказната во лимитираната серија од осум епизоди нема да се базира на актуелниот документарец на Netflix, туку на месечните текстови што Леиф Реигстад со години ги пишуваше за Егзотик како дел од серијалот Joe Exotic: A Dark Journey Into the World of a Man Gone Wild.
Продуцентските куќи Imagine Television Studios и CBS Television Studios во јуни, 2019 година конечно ги откупија правата на текстовите од серијалот што Реигстад го пишуваше за Texas Monthly.
Џо Егзотик, чие вистинско име е Џозеф Малдонадо-Пасаж во моментов отслужува 22-годишна затворска казна за насилство врз животни, како и за организирање на убиството на неговата соперничка Керол Баскин.
Кејџ во изминативе години има купувано егзотични животни и има чувано кобри како домашни миленици. Актерот вели дека наоѓа голема инспирација во животните.