Унгарскиот државен секретар за меѓународна комуникација Золтан Ковач изјави дека Унгарија ќе продолжи да обезбедува хуманитарна и финансиска помош за Украина.
Оваа изјава дојде по вчерашната средба меѓу украинскиот претседател Володимир Зеленски и унгарскиот премиер Виктор Орбан во Брисел.
Ковач на Twitter сподели фотографија на која Орбан и Зеленски се ракуваат на маргините на состанокот на Европскиот совет.
„Поддржуваме итен прекин на огнот за да се избегнат нови смртни случаи. Унгарија припаѓа на мировниот табор“, му рекол Орбан на украинскиот претседател, тврди Ковач.
Унгарија првично го блокираше пакетот помош за Украина
Во април минатата година, Орбан го нарече Зеленски еден од „противниците“ што мора да ги надмине за време на неговата кампања за да обезбеди четврти последователен мандат како лидер на Унгарија. Во декември, Унгарија првично го блокираше пакетот помош од 19 милијарди долари за Украина, но подоцна се откажа од противењето во замена за финансиски придобивки од Европската унија.
Неколку недели се шпекулираше и дека Орбан ќе ја одложи кандидатурата на Шведска и Финска за членство во НАТО, но на крајот најави дека ќе ја ратификува унгарскиот парламент.
