Играат во македонската Втора лига, ама имаат право да сонуваат и ако ништо друго сами да си го направат филмот. Кочанскиот клуб сними спот за презентацијата на гостинските дресови, а кога човек не би знаел за кој клуб се работи, би помислил дека е некој калчолигаш.
Уште пред некоја година кога група млади дечки го презедоа управувањето со Осогово, клубот почна да сонува големо. Резултатите сѐ уште не се по планот, клубот мака мачи да стане стабилен второлигаш, но затоа пак кога станува збор за медија делот, доминира на македонската сцена.
Изминативе години Осогово се промовираше како најдобро застапен македонски фудбалски клуб на интернет сцената, засенувајќи ги гигантите Вардар и Шкендија на тој план. Twitter, Instagram, Facebook... ако на зеленениот терен често губат, на социјалните мрежи никој македонски клуб не може да ги победи.
И сега повторно се јавија со нова креација: промотивен спот од снимањето на гостинските дресови. Да не знае човек дека се работи за Осогово, ќе помисли небаре гледа видео од некој италијански калчолигаш.
Инаку, не се работи ни за нови дресови. Ова е гостинската гарнитура на дресови кои клубот ги воведе лани, а и годинава ќе настапува во нив. Тоа не значи дека кочанчани не може да си го направат меракот и да си снимат спот.
