Археолозите во античкиот римски град Помпеја открија фреска на која е прикажано нешто што би можело да биде претходник на добро познатата италијанска пица.
Парче тесто прикажано на фреска стара 2.000 години „можеби е далечен предок на модерното јадење“, соопшти италијанското Министерство за култура. Фреската е пронајдена во ходникот на куќа до пекара за време на неодамнешните ископувања на локација во Јужна Италија.
Откритието е направено годинава за време на новите ископувања во Регионот IX во центарот на Помпеја, една од деветте области на кои е поделен античкиот локалитет. Зградата била делумно ископана во XIX век пред повторно да започнат ископувањата во јануари годинава, речиси 2.000 години по вулканската ерупција што го проголтала градот.
Археолозите од паркот за светско наследство на УНЕСКО велат дека новооткриената фреска на која е прикажано тестото, насликана покрај пехар со вино, се јадела со овошје како калинки или урми или зачинета со зачини и еден вид песто сос.
Директорот на центарот на Помпеја, Габриел Цухтригел, рече дека го покажува контрастот помеѓу „штедливиот и едноставен оброк“ и „луксузот на сребрените послужавници“.
„Како да не мислиме, во оваа смисла, на пицата, исто така родена како јадење на 'сиромашните' во Јужна Италија, која сега го освои светот и се служи во ресторани со ѕвезди“, вели Цухтригел.
Во близина на рерната во работните површини од куќата се пронајдени и скелети на три лица, се додава во соопштението на Министерството за култура.
Ерупцијата на Везув во 79 година ја закопала Помпеја во пепел, замрзнувајќи го градот и неговите жители во моментот. Локалитетот е богат извор за археолозите од неговото откривање во XVI век. Локалитетот е на само околу 23 километри од градот Неапол, модерниот дом на италијанската пица под заштита на УНЕСКО.
