Завршниот турнир во кошаркарскиот Куп на Македонија ќе се одржи во Градот на конзулите. На турнирот ќе учествуваат 8 екипи, а ќе се одигра во периодот од 15 до 17 февруари во спортската сала „Боро Чурлевски“.
Согласно со пропозициите за натпреварување на Купот „Благоја Георгиевски-Буштур“ 2024 во машка конкуренција, Македонската кошаркарска федерација распиша конкурс за техничка организација на завршниот турнир од ова натпреварување.
По предвидениот рок за испраќање на пријави за добивање на организацијата, донесена е одлука организацијата на финалниот турнир за натпреварувачката сезона 2023/2024 година да му се додели на КК Пелистер од Битола, соопшти КФСМ.
Завршниот турнир во фајнал-ејт формат ќе се одигра во периодот од 15 до 17 февруари во спортската сала „Боро Чурлевски“ во Битола.
Место во завршницата на ова натпреварување обезбедија екипите на: МЗТ, Еуро Никел, Пелистер, Чаир 2030, Работнички, ТФТ Моцарт, Феникс и Гостивар.
Согласно со пласманот на екипите по првиот круг од регуларниот дел од сезоната (11 одиграни кола) од Првата лига (мажи), во четвртфиналето ќе се сретнат:
(1) МЗТ – (8) Гостивар
(2) Пелистер – (7) Феникс
(3) Еуро Никел – (6) Чаир 2030
(4) Работнички – (5) ТФТ Моцарт
Македонската кошаркарска федерација ќе биде организатор на финалниот турнир од Купот „Благоја Георгиевски-Буштур“ 2024 во женска конкуренција. Терминот и местото на одигрување на завршницата на Купот за жени ќе бидат дополнително објавени.
