Нема крај на пеховите за репрезентативците на Франција и Белгија откако повторно се пожалија на повреди, сега на 20 дена до почетокот на Мундијалот во Катар.
Пол Погба само што се врати на тренинзи кај Јувентус и требаше и да заигра наредниот викенд, повторно мора да паузира. Италијанските медиуми пренесуваат дека тој повредил мускул на бедрото за време на петочниот тренинг. Од клубот и по неколку дена немаат излезено со официјална информација за тоа колку тешка е новата повреда на несреќниот Погба. Медиумите на Чизмата наведуваат дека шансите тој да настапи во Катар се загубени и дека речиси сигурно нема да патува на светскиот собир.
Од францускиот трабор се поголеми оптимисти и се надеваат дека ќе се опорави до последниот момент кога селекторот Дидје Дешам треба да го предаде конечниот список на играчи кои ќе ги води во Катар.
Сличен пех доживеа и белгискиот голгетер Ромелу Лукаку. Интер потврди дека робусниот напаѓач е повторено повреден откако во саботата влезе во игра во 68. минута против Сампдорија.
„Лукаку утринава беше прегледан во клиниката 'Уманитас' во Роцано. Има истегнување на феморалниот бицепс на левото бедро. Состојбата на играчот дополнително ќе биде проценета во наредните неколку дена“, стои во клупското соопштение.
Како и Французите, и во таборот на Белгија се оптимисти дека Лукаку ќе го имаат во Катар. Белгиски Lesoir пишува дека Лукаку ќе го пропушти вторничкиот дуел со Баерн во Лигата на шампиони, како и неделното дерби против Јувентус, но ќе се врати за Мундијалот.
Белгија на Мундијалот е во група со Канада, Мароко и Хрватска, додека Франција за противници ги има Австралија, Тунис и Данска.
