Астрономите најавуваат дека на крајот од месецов на небото ќе имаме прилика да ја видиме необичната конјукција на нашиот природен сателит со двете најсјајни планети во Сончевиот Систем, настан кој повторно ќе биде видлив во 2025 година.
Од 21 февруари на нашебо небо може да се види астрономски спектакл во кој планетите Венера и Јупитер се наоѓаат на аголно растојание од 30º, додека помеѓу нив е Месечината. За целиот настан да биде уште поинтересен се грижи природата која на нашиот природен сателит му дава розевкаста боја, а сето тоа поради светлината што се одбива од Земјата.
После ова Месечината ќе го продолжи својот пат, додека растојанието помеѓу планетите ќе почне да се намалува. Кулминацијата на овој феномен се очекува помеѓу 28 февруари и 2 март, кога аголната оддалеченост помеѓу нив ќе биде само 1º. Додека ќе набљудуваме од Земјата, нам тоа ќе ни делува како да станува збор за еден планетарен систем.
За да не пропуштите ништо од овој небесен спектакл на запад побарајте ги Венера и Јупитер во соѕвездието Риба. Бидејќи ѕвездите околу нив не се посебно светли, лесно ќе ги воочите на ноќното небо. Можно е дури и да можете да ги разликувате - дури и да сте лаик - бидејќи Венера ќе сјае поинтензивно од Јупитер.
Уште еден репер за полесно снаоѓање при потрагата на небото може да ви биде и соѕвездието Пегаз - десетина сјајни ѕвезди кои се наоѓаат лево од овие две планети.
Сепак, не заборавајте дека ништо од ова нема да биде видливо доколку небото не е ведро. Покрај тоа, во обѕир треба да го земете и фактот дека во големите градови присутно е и светлосното загадување, кое влијае врз видливоста на ноќното небо.
Иако во оваа прилика ќе ги видиме планетите една крај друга како се допираат, ова во суштина е само оптичка илузија поради положбата во која се наоѓа Земјата. Вистината е дека Венера и Јупитер се оддалечени над 900 милиони километри. Ваквите феномени настануваат поради разликата во движењето на планетите, иако сѐ се движи во иста насока и приближно во иста рамнина.
Конјукцијата помеѓу Венера и Јупитер е видлива само еднаш годишно. Меѓутоа, мислењето на експертите е дека ако не ја искористите оваа прилика - наредната ќе ви се укаже во 2025 година. Пред сѐ бидејќи наредната конјукција ќе се случи толку блиску до Сонцето што практично ќе биде невозможна за гледање.
