Се одиграа првите полуфинални натпревари во Лига Европа и Конференциската лига, а ниту една од екипите не направи недостижна предност пред реваншот.
Дербито се одигра на стадионот „Алианц“ во Торино помеѓу Јувентус и Севиља, а дуелот заврши 1:1 со гол во 7. минута од судиското надополнување.
Јусеф Ен-Несири погоди во 26. минута за водство на гостите од Андалузија. Тоа е 16-ти гол сезонава за одличниот Мароканец, исто толку голови колку и Килјан Мбапе, на пример.
Во првото полувреме Душан Влаховиќ имаше две одлични шанси за домашните. Во 19. минута го заобиколи голманот, но Боно сепак некако успеа да го спаси својот тим. Во следниот напад Влаховиќ од одлична позиција шутираше покрај голот.
Во продолжение Јувентус со сите сили тргна напред, домашните се надеваа на пенал на крајот од натпреварот, но по ВАР интервенцијата немаше удар од белата точка. Кога се чинеше дека дуелот ќе заврши со победа на гостите, Федерико Гати во 7. минута од надополнувањето со глава погоди за 1:1.
Вториот натпревар заврши со победа на Рома од 1:0 против Баер Леверкузен.
Стрелец на единствениот гол на натпреварот беше младиот Едуардо Бове во 63. минута откако испрати одбиена топка по ударот на Тами Ејбрахам.
Тимот на Жозе Мурињо е во добра позиција, па на реваншот во Леверкузен сѐ што ќе треба да направи е да не загуби.
И во Конференциската лига се одиграа двата полуфинални натпревари. Вест Хем на домашен терен беше подобар од АЗ со 2:1, додека голема победа на гости оствари Базел со 1:2 кај Фиорентина на „Артемио Франки“.
Лига Европа:
Рома - Баер Леверкузен 1:0
63' Едоардо Бове
Јувентус - Севиља 1:1
90'+7 Федерико Гати - 26' Јусеф Ен-Несири
Конференциска лига:
Фиорентина - Базел 1:2
25' Антонио Кабрал - 71' Анди Диуф, 90'+3 Зеки Амдуни
Вест Хем - АЗ 2:1
67' (п) Саид Бенрахма, 76' Мајкл Антонио - 41' Тајани Рајндерс