Манчестер Јунајтед го чекаат дури четири натпревари по ред на домашен терен, но проблемот е што тимот игра многу подобро на гости.
Оле Гунар Солскјер е пред вистински предизвик. Неговиот тим како да не е истиот кога игра на сопствениот „Олд Трафорд“ стадион, а ќе мора да ја урне таа, очигледно, психолошка бариера кај неговите избраници. Манчестер сезонава дома победи само два пати, исто толку одигра нерешено, а забележа три победи.
„Последниот натпревар кој го игравме на 'Олд Трафорд' беше солиден. Оттогаш се подобривме и во поглед на начинот на кој напаѓаме и севкупно во играта. Надвор од дома игравме добро, но сега нема патувања и имаме повеќе време да се одмориме измеѓу натпреварите, па би требало да сме спремни“, вели норвешкиот стратег.
Нажалост, препознатливата атмосфера на „Олд Трафорд“ периодов ќе изостане поради рестрикцијата за присуство на публика.
„Да се биде дома и да се имаат сопствените навивачи кои знаат што се обидуваме да направиме и кои на играчите им даваат поддршка и охрабрување, тоа е меѓу најважните нешта“, рече тој за клупскиот ТВ канал.
„Сите мои играчи и дури и играчите кои доаѓаат од надвор секогаш зборуваат за тоа колку лојални се нашите навивачи. Така да едвај чекам да ни се вратат, а ние ќе направиме сѐ што можеме за да освоиме што е можно повеќе бодови додека тоа не се случи“.
Вечерва во 21 часот почнува домашната серија на Јунајтед со натпреварот против Вулверхемптон. Потоа на први ја пречекува Астон Вила, на шести играат против градскиот ривал Манчестер Сити во Лига купот, додека серијата ќе заврши на 9-ти против Вотфорд.
