На денот на важната пресметка со Рома, коронавирусот го нападна Милан. Репрезентативниот голман Џиџи Донарума и норвешкото крило Хауге излегоа позитивни и нема да играат.
Лоши вести за Стефано Пиоли. Џанлуиџи Донарума и Јенс Петер Хауге добија позитивни резултати на тестирањето за COVID-19 направено синоќа вечер. Веќе се ставени во самоизолација и дефинитивно отпаднаа од списокот за вечерашното дерби со Рома. Позитивни се уште тројца членови на стручниот штаб, а сите петорица се асимптоматски.
„Милан известува дека лабораториските тестови направени синоќа дадоа позитивен резултат на примероците земени од Џанлуиџи Донарума и Јенс Петер Хауге и тројца други членови на поширокиот тим. Сите се асимптоматски и веднаш се ставени во домашна изолација, а информирани се и локалните здравствени власти. Денеска целиот тим одново беше тестиран, согласно протоколот, и нема нови позитивни“, стои во клупското соопштение.
На место на Донарума вечер помеѓу стативите ќе застане романскиот голман Чиприан Татаришану. Тој во Милан пристигна на почетокот од септември од Лион и вечерва ќе дебитира со црвено-црниот дрес.
Левиот крилен офанзивец Хауге на 1 октомври му се приклучи на Милан од норвепки Боде/Глимт и досега настапи на 1 натпревар во Серија А и 4 во Лига Европа од кои 3 во квалификациите.
Милан ја пречекува Рома на „Џузепе Меаца“ вечерва од 20:45 часот во обид да ја продолжи перфектната серија сезонава. „Росонерите“ се единствени со максимален ефект и без разлика на резултатот вечерва и по 5 кола ќе останат на првото место.
