Големо изненадување се случи на воведниот натпревар од 10. коло во македонската Прва Лига во кој Работнички дома загуби од Скопје.
„Романтичарите“ пропуштија колосална шанса со три бода да се доближат до врвот, а воедно и важеа за голем фаворит на натпреварот со кандидатот за испаѓање - Скопје.
Работнички беше подобар со топката, но не искористи ниту една шанса, а промаши и удар од белата точка.
Огромна шанса да го отвори резултатот во 11. минута имаше Дејан Тантуровски кога на асистенција на Марио Станковски успеа некако да го промаши целиот гол на Скопје, кој патем беше празен.
Потоа во 30. минута Работнички доби пенал, но голманот Андреја Ефремов го одбрани ударот на Станковски.
Казната за домаќините стигна десетна минути после паузата кога Станковски, згора на промашениот пенал, си постигна автогол по еден корнер на гостите.
Да биде работата уште потешка за тимот од Градски парк се погрижи невнимателниот Бојан Илиевски кој во 65. минута доби втор жолт картон и ги остави соиграчите со десетмина да бркаат негатива.
Скопје можеше да ја завери победата кога во 85. минута доби пенал по фаулот направен од Тантуровски над Ален Јашароски, но овој пат домашниот голман Бурхан Мустафа го прочита и одбрани ударот на Иво Јанакиевски.
Работнички останува на 15 бодови, додека Скопје сега има 12. Позициите на двата тима на табелата се подложни на промени бидејќи утре на програмата се останатите пет натпревари од ова коло, кое е поместено поради локалните избори в недела, по што и ќе се добие конечната табела за 10. коло.
