Американските медиуми пишуваат дека на бејзбол натпреварот на Чикаго Вајт Сокс, одигран ноќеска, две гледачки биле ранети од огнено оружје.
Според информациите, едната била ранета во ногата, а другата во стомакот, а полицијата сѐ уште не може да докаже дали пукачот бил внатре на стадионот или куршумите дошле однадвор.
Германската новинска агенција DPA јавува дека истрагата е во тек и дека активно се спроведуваат сите истражни дејствија за да се докаже што точно се случило.
„Мислите на нашиот клуб Вајт Сокс се со жртвите во овој момент и им посакуваме брзо закрепнување“, се вели во соопштението на клубот.
Натпреварот го следеа околу 22.000 фанови на „Гарантид Рејт Филд“ во Чикаго, а по натпреварот требаше да има концерт на стадионот. Но, организаторите го откажаа поради технички проблеми.
Што се однесува до самиот натпревар, Чикаго загуби со 4-12 од Оукленд Атлетикс. И на двата тима не им оди добро сезонава: Чикаго е на 13-тото место во Американската лига, додека Оукленд е последен, 15-ти, во истата.
