„Скандалозно судење на Димитар Пилешков!“ вака почнува јавната реакција на фудбалскот клуб од скопската населба Дебар Маало кој синоќа прими петарда на домашен терен, но и на двапати беше оштетен за пенал од главниот суддија.
За само две минути во првиот дел, кога резултатот беше 0:2 за Академија Пандев, Работнички беше оштетен за удар од белата точка. Прво во 38. минута судијата Димитар Пилешков од нејасни причини, иако беше веднаш до случката со одличен поглед, не покажа пенал кога топката удри во раката на гостински играч, која патем беше во неприродна положба. Во наредната минута повторно остана нем кога Филип Бошковски беше соборен во гостинскиот шетнаесетник.
За да не биде причина само мислењето на Работнички, можеби и пристрасно, дека навистина овој клуб бил отшетен потврди и судиската анализа на ФФМ, објавена денес.
„Погрешна одлука на главниот судија што дозволи играта да продолжи, иако беше многу добро поставен. Во оваа ситуација требаше да се досуди удар од 11 метри за екипата на Работнички“, стои во анализата на ФФМ, исто објаснување за двете спорни ситуации.
По овие две спорни ситуации Академија Пандев постигна и трет гол, а на крајот натпреварот го доби со високи 5:0.
„Фудбалскиот клуб Работнички изразува огромно незадоволство од катастрофалното судење на главниот судија Димитар Пилешков, кој драстично го оштети нашиот тим на вчерашниот првенствен натпревар против Академија Пандев. Тој не досуди два очигледни пенали за Работнички во првото полувреме и на тој начин директно влијаеше на крајниот резултат на мечот.
ФК Работнички жестоко реагира на скандалозната арбитража на Димитар Пилешков и бара од Фудбалската федерација на Македонија да поведе постапка против судијата, но и да го заштити интегритетот на натпреварувањето.
Фудбалскиот клуб Работнички не сака и не смее да биде заложник на поединци, а не сака воопшто да верува дека сето ова има и поголема смислена позадина, и бара од ФФМ максимална заштита од судиски кадри кои не се кадарни и достојни да бидат дел од прволигашката елита.
Нема да дозволиме никој да си игра со реномето на ФК Работнички и со скандалозни судиски одлуки и грешки да го уништува сето она она што клубот го градел со децении инвестирајќи во генерации фудбалски имиња како и инвестирајќи во иднината на македонскиот фудбал“, стои во соопштението ан Работнички.
Катастрофалното судење на штипскиот судија имаше можност да го види целокупната фудбалска и спортска јавност преку ТВ преносот од натпреварот кој одеше на МРТ, но и на Arena.