На голманот на Милан му е понуден нов договор, но тука е агентот Мино Рајола да ги помати сметките.
Договорот на Џанлуиџи Донарума со „Росонерите“ истекува наредното лето, па поради тоа Милан веќе подготвува нов и тоа повеќегодишен договор со годишна плата од 7 милиони евра.
Во преговорите засега пречка е неговиот агент и тоа познатиот Мино Рајола кој на управата на клубот им порачал дека мораат уште да ја зголемат платата за неговиот клиент да остане.
Шпекулациите кои доаѓаат од Италија говорат дека за младиот голман најзагреан е Јувентус кој веќе неколку години како сака да го донесе, додека сега наводно и Интер се вмешал во играта. „Нераѕурите“ сакаат замена за сѐ понесигурниот ветеран Самир Хандановиќ.
Милан ќе мора брзо да ја реши ситуацијата бидејќи ризикува на лето да го изгуби Џиџи за беспари.
Сезонава Донарума е предводник на одбраната на Милан која во Серија А само 4 пати капитулираше.