Добри вести стигнаа попладнево од Меѓународната ракометна федерација која испразнетото место на Мундијалот во Египет ѝ го додели на Македонија.
Повеќе резпрезентации последниве денови пријавија позитивни резултати на тестовите за COVID-19, а иако првично сите беа упорни дека ќе патуваат на Мундијалот, макар и со крпен состав, сепак денеска попушти Чешка.
Чесите ја известиле ИХФ дека не се во можност да состават тим и мораат да го откажат својот настап. Уште претходно ИХФ состави листа на репрезентации кои како резерви ќе чекаат некој да откаже за да влетаат на светскиот собир, а токму на таа листа прва резерна е Македонија.
„Поради неколку позитивни резултати на задолжителните COVID-19 тестирања пред тргнувањето за Египет, Чешка официјално нѐ извести дека го повлекува настапот на 27. ИХФ машки Мундијал, кој ќе се одржи од 13 до 31 јануари 2021 во Египет. Првата замена Северна Македонија е веќе поканета да настапи“, извести ИХФ.
Напшата репрезентација ќе го заземе местото на Чешка во интересната група Г каде се домаќинот Египет, Шведска и Чиле. Првите три од секоја група продолжуваат понатаму.
Македонија изминатиов период се подготвуваше како да ќе игра на Мундијалот со оглед на тоа дека шансите за вакво сценарио беа големи, и на крајот се покажа правилна одлуката репрезентацијата да биде на готовс.
Првиот натпревар на Македонија е в четврток во 20:30 часот против Шведска во Каиро. На 16-ти играме со Египет од 18 часот, а на 18-ти со Чиле од 15:30.
Пренос од Мундијалот ќе врши МРТ.
Македонија не доби шанса да се бори за пласман на Мундијалот бидејќи ИХФ ги откажа баражите. Судбината сепак реши нашите ракометари по петти пат во низа да играат на мундијалите, а вкупно ова ќе биде наш седми настап.