БУНДЕСЛИГА 2019/20

Рурското дерби му дава шмек на рестартот на Бундеслигата

Бундеслигата дефинитивно се реактивира претстојниов викенд, а на програмата е и големото Рурско дерби помеѓу Борусија и Шалке 04.

Конечно љубителите на фудбалот ќе имаат можност повторно да уживаат во квалитетен фудбал. Доста беше преноси од Никарагва, Белорусија и Таџикистан, почнува Бундеслигата, една од најквалитетните лиги во светот.

Наместо во петок вечер, рестартот на Бундеслигата ќе биде во сабота од 15.30 часот со пет натпревари. Меѓу нив и големото дерби на лутите ривали од Дортмунд и Гелзенкирхен, Борусија и Шалке 04.

Домаќините ќе бидат без Емре Џан, капитенот Марко Ројс, Нико Шулц, Дан-Аксел Загаду и Аксел Вицел, додека тренерот Лусјан Фавр допрва ќе види дали ќе може да смета на Марсел Шмелцер кој има мускулни проблеми.

На спротивната страна Давид Вагнер нема посериозни проблеми бидејќи во неговиот тим неизвесни се единствено Озан Кабак, капитенот Омар Маскарељ и Бенжаман Стамбули.

Ова ќе биде вкупно дерби број 156 во сите официјални натпреварувања. Шалке 04 е подобар со 60 победи, Борусија има 52, додека 43 пати играле нерешено. И гол-разликата е на страната на тимот од Гелзенкирхен со 294 наспроти 238 постигнати голови. Последната пресметка во октомври на „Фелтинс“ арената заврши без голови.

Лидерот Баерн својот натпревар ќе го одигра в недела гостувајќи во главниот град Берлин кај тимот на Унион.

Сите натпревари ќе се играат без присуство на публика, а на трибините ќе бидат поставени картонски слики од навивачи со што наместо празни столчиња оддалеку ќе се добива слика како да има луѓе.