Светската одбојкарска федерација ФИВБ ѝ ја одзеде на Русија организацијата на Светското првенство кое годинава требаше да се одржи во оваа земја.
Поради воената инвазија на Русија над Украина рускиот спорт ќе остане посиромашен и за едно Светско првенство. Од 26 август до 11 септември љубителите на одбојката ја очекуваат пресметката на најдобрите одбојкарски репрезентации на светот. Но, сега ФИВБ ќе мора да бара нов домаќин.
„Административниот борд на ФИВБ одлучи дека ќе биде невозможно да се подготвува за организирање на Светското првенство во Русија поради војната во Украина. Согласно тоа, падна одлука да ѝ се одземе организацијата на Русија“, објави ФИВБ.
ФИВБ сега ќе бара нова земја домаќин на јубилејното 20-то Светско првенство. Со отстранувањето на Русија како домаќин се отвори и едно слободно место на завршницата (група А) бидејќи Русија се имаше квалификувано како домаќин. Воедно, Русија е суспендирана од очество на сите одбојкарски настани, а суспензија доби и Белорусија.
Русија имаше пријавено 10 градови за организацијата и тоа Москва, Санкт Петербург, Калининград, Јарославл, Казањ, Уфа, Екатеринбург, Новосибирск, Кемерово и Краснојарск.
Синоќа Холандија објави дека нема да учествува на Првенството доколку истото се одржи во Русија.
Квалификувани се Порторико, Србија, Тунис (група А), Бразил, Куба, Јапонија, Катар (група Б), Бугарија, Мексико, Полска, САД (група Ц), Камерун, Франција, Германија, Словенија (група Д), Канада, Кина, Италија, Турција (група Е), Аргентина, Египет, Иран, Холандија (група Д).
