Шефот за фудбал во „Старата дама“ стави крај на шпекулациите кои велеа дека Маурицио Сари по само една сезона ќе биде отстранет од клупата на шампионот.
„Без двоума, Сари ќе биде тренер на Јуве и наредната сезона“, потврди Фабио Паратичи, шеф за фудбал во клубот од Торино.
Веќе некое време на Чизмата и тоа како се зборува дека поради неубедливата игра Сари нема да продолжи да седи на клупата на Јувентус. Сепак, така не мислат и луѓето во клубот, а Паратичи даде и една споредба со поранешниот тренер Масимилијано Алегри.
„Овде сум 10 години, во 9 практично секогаш бевме први или речиси на врвот. Минав 5 години со Алегри во кои освоивме 9 од можни 10 титули во Италија, плус некој освоен или загубен Суперкуп. Секој пат по некој нерешен резултат, па и после победа, имаше внатрешни гласини. Веќе сме навикнати на такви нешта, сега се смееме на таквите, така беше и во случајот со Сари изминатава недела“, вели тој.
Паратичи ги поби и гласините за наводното несогласување на Сари со главната ѕвезда во тимот, Кристијано Роналдо.
„Кристијано е многу чувствителна личност, образована, која не дозволува да му тежи статусот на најдобар фудбалер во светот. Има многу нормален однос како со нас управата, така и со фудбалерите и со тренерот“.