Саудиска Арабија планира да изгради високотехнолошки стадион на врвот на карпа висока 200 метри за Светското првенство во 2034 година, кое ќе се одржи во оваа блискоисточна земја.
Саудијците останаа единствен кандидат за домаќини на Мундијалот, а на крајот очекувано ФИФА ги прогласи за домаќини на најголемиот турнир во светот на фудбалот. Натпреварувањето ќе се одржи во 2034 година.
Дотогаш Саудијците планираат целосно да го преземат светскиот спорт и да станат главен играч во следната деценија. Се очекуваат огромни инвестиции во стадионите, а претставен е концептот на еден од нив, кој ќе биде вистинско светско чудо.
Станува збор за стадион со капацитет од 45.000 седишта кој ќе биде изграден на врвот на карпа висока 200 метри во близина на главниот град Ријад. Стадионот ќе го носи името на принцот Мохамед бин Салман Ал Сауд.
Qiddiya Investment Company (QIC), која е задолжена за изградба на стадионот, нагласува дека зданието ќе има покрив и терен што ќе се извлекуваат и повлекуваат по потреба и стотици метри LED ѕид за да се создаде извонредно искуство за навивачите.
Ѕидот со LED диоди е дизајниран да отвора поглед на градот долу и се наоѓа на 45 километри од главниот град Ријад. QIC е во целосна сопственост на државата Саудиска Арабија, односно Фондот за јавни инвестиции управуван од самиот Бин Салман, кој е и сопственик на англискиот премиерлигаш Њукасл.
Она што е интересно е дека стадионот ќе стане нов постојан дом за гигантите на локалниот фудбал, Ал Наср и Ал Хилал, кои во последната година донесоа бројни ѕвезди.
