Се чека конечниот збор од 57-годишниот Холанѓанец за да се продолжат напорите да се донесе Лаутаро Мартинес.
„Бевме во преговори со Интер, но сѐ застана кога се обнови фудбалската сезона. Ќе разговараме со новиот тренер и ако Лаутаро е во неговата визија, ќе се обидеме да го донесеме. Најважно е тренерот да каже: Да!“, рече Бартомеу.
Италијанските медиуми пишуват дека Куман го сака 22-годишниот аргентински напаѓач и дека ќе се обиде да го доведе со размена на играчи во која на Интер би му го понудил Луис Суарес или Серхио Бускетс. Станува збор за легенди на Барса кои Бартомеу синоќа не ги наведе меѓу седумте играчи кои нема да бидат ставени на продажба летово.
Претходно, Интер за својот најдобар играч бараше повеќе од 100 милиони евра, но во Барса сметаат дека поради пандемијата би можеле да го донесат Аргентинецот за помалку пари, а дополнително се обидуваат да ја намалат цената со вклучување и друг играч во договорот.
Мартинес е во Интер од 2018 година и сезонава постигна 21 гол и седум асистенции. Еден гол ѝ даде на Барселона на натпреварот во групната фаза и тоа на Камп Ноу. За Аргентина има одиграно 17 натпревари и има постигнато 9 гола.