Во Индија започна Холи, познатиот фестивал на боите.
Холи - фестивал на позитивно обоени емоции, се слави секоја година во март, после полна месечина, според хинду календарот.
На првиот ден по полната месечина во март, доаѓа пролетта - за жителите на Индија тоа значи дека е време за Холи.
Денот после полната месечина се слави во речиси секое ќоше на Индија како еден од најголемите хинду празници на кои му се припишуваат различни значења, но сите тие се сведуваат на играње, танцување и ширење позитивна енергија.
Холи е фестивал на бои - главна карактеристика на празникот е прскањето со вода и светли бои.
Празникот се празнувал уште пред Христа, а порано се нарекувал Холика. Името го добил по богот Кришна, реинкарнација на богот Вишну. Според легендата, Кришна на шега полил една селанка со вода и бои и од таму потекнува обичајот на кој сите подеднакво му се радуваат.
Победа на доброто над злото - значи палење и уништување на демонот по име Холика. Се верува дека Холика е сестра на злобниот крал Хиранјакашипу. Затоа, во пресрет на самиот празник, на улиците се пали голем оган, со портрет на Холика во средината, за кој мажите со денови подготвуваат дрва. Тоа се нарекува и „малиот Холи“.
Празник на мажените жени - кој слави и повикува на среќен брак и семејна благосостојба.
Ден на благодарноста за успешната сезона на жетва / Пролетен фестивал
Фестивал на љубовта - затоа што го велича семејството и затоа што порано се договарале бракови на овој празник. Семејствата го поминуваат овој ден заедно, со храна, пијалаци, бои, музика и танцување.
Најголемите настани за време на овие празнувања се одржуваат во градовите Матура и Вриндава во индиската сојузна држава Утар Прадеш, бидејќи се верува дека Кришна бил роден и израснат во овој регион.
