УЕФА ги откри имињата на судиите кои ќе судат на натпреварот помеѓу Австрија и Македонија в недела.
Судиска тројка од Шведска е делегирана од страна на УЕФА да го води натпреварот на кој македонската репрезентација ќе дебитира на Европските првенства.
Се работи за 36-годишниот главен судија Ларс Кристиан Андреас Екберг со помошниците Мехмет Мохамед Џулум и Стефан Халберг.
Екберг, чиј правилен шведски изговор е Екбериј, е полицаец по професија, а како фудбалски судија се бави уште од кога имал 13 години. Професионален судија е од 2004 година. Во најдобрата шведска лига суди од 2009, а со знакот на ФИФА се стекнал во 2013.
Првиот помошник Џулум е 38-годишен роден во Турција, по мајка Либанец. Во Шведска имигрирал со фамилијата кога имал 5 години. На 16 години почнал да суди и тоа како професија со цел да заработи пари бидејќи има 8 браќа и сестри.
Халберг (правилен шведски изговор Халбериј) има 39 години и неговара вистинска професија е менаџер во фирма. Почнал да суди на 15 години, а со знакот на ФИФА од 2013 година.
Четврти судија ќе биде Сергеј Геннадјевич Карасјов кој со знакот на ФИФА е од 2010 година. По професија е адвокат и тој всушност е еден од главните судии на првенството, кои на некои натпревари ќе ја вршат улогата на четврти судии.
Во ВАР собата во Швајцарија ќе бидат сместени Германецот Бастиан Данкерт со помошниците Англичанецот Крис Кавано и Французите Бенжаман Паж и Жером Бризар.