Директорот на Светската здравствена организација Тедрос Гебрејесус изјави дека лекот за новиот коронавирус е национално единство и глобална солидарност, но предупреди дека вирусот уште долго време ќе биде со нас.
Европската комисија организираше конференција на која онлајн присуствуваа лидери на 40 земји, при што постигната е согласност за финансиска помош од 7,4 милијарди евра за поддршка на развој на лек и за вакцина против COVID-19.
Гебрејесус истакна дека овој настан е показател на силна глобална солидарност и дека сите треба подеднакво да бидат заштитени.
Претседателката на ЕК, Урсула фон дер Лејен соопшти дека светот покажа единство во борбата против коронавирусот.
„Учесниците ветија дека ќе донираат вкупно 7,4 милијарди евра за потребите на развој на дијагностика, лекување и вакцина против COVID-19“, изјави таа.
Истакнувајќи дека е постигната соработка на глобално ниво, таа изрази и голема благодарност до научниците и истражувачите кои работат за решавање на проблемите со пандемијата.
