Светската здравствена организација (СЗО) за време на викендот регистрирала околу 400.000 нови случаи на COVID-19 во светот, што според неа, покажува дека новата пандемија на коронавирус не покажува никакви знаци на слабеење.
-Епидемијата забрзува. Ние сѐ уште не сме го достигнале пикот на пандемијата, изјави денеска генералниот директор на СЗО, Тедрос Аданом Гебрејесус, на онлајн прес-конференција во Женева.
СЗО, исто така, соопшти дека ги признава „новите докази“ за пренесување на коронавирусот преку воздух.
Меѓународна група од 239 научници вчера ги повика властите, вклучувајќи ја и Светската здравствена организација, да признаат дека коронавирусот може да се шири и низ воздухот на растојанија од повеќе од два метра и соодветно да ги преиспита нивните упатства за превенција.
Во коментарот објавен во списанието „Клинички инфективни болести“, експертите напишаа дека студиите покажале дека „надвор од секакво сомневање“ е дека вирусите можат да патуваат десетици метри во воздухот, а анализите на некои настани покажале дека истото важело и за вирусот Sars-Cov-2 кој ја предизвикува болеста COVID-19.
Нивните препораки вклучуваат поголема вентилација во затворен простор, воведување на високо ефикасни филтри за воздух и ултравиолетови ламби, како и избегнување на пренатрупаност во зградите и јавниот превоз.
