За прв пат во историјата на 63-години старата франшиза, тимот на Тексас Ренџерс ја освои Светската серија, а во финалето на МЛБ плеј-офот го совлада тимот на Аризона Дајмондбекс. До решавачката победа дојде синоќа на „Чејс Филд“ стадионот во Феникс победувајќи со 5:0, додека вкупниот резултат во серијата гласи 4-1 за Тексас.
Мич Гарвер го прекина нерешениот резултат со РБИ сингл во седмиот ининг, а Јунг и Хајм ја потврдија победата во деветтиот. На овој начин Ренџерс ја освоија долгоочекуваната титула, по двете загубени финалиња во 2010 и 2011 година. А, за подвигот да биде уште поголем, трофејот во МЛБ пристигна по сезона во која Тексашаните загубија дури 102 натпревара!
Ренџерс имаа перфектен учинок на гостувањата во плеј-офот со 11 победи без пораз, а „есенската класика“ ја завршија со три победи во низа во Аризона. Кори Сигер беше прогласен за најкорисен играч (МВП) во финалната серија. И тоа по вторпат во кариерата, по успехот со Лос Анџелес Доџерс во 2020 година.
Во плеј-офот Тексас Ренџерс почнаа од вајлд-карта серијата елиминирајќи ја Тампа Беј Рејс со 2-0. Потоа во четвртфиналето ги елиминираа Балтимор Ориолес со 3-0, а во полуфиналето Хјустон Астрос со 4-3.
Ова беше второ финале за Аризона Дајмондбекс, кои по поразот од Тексас останаа на едната титула освоена во 2001.
