Репрезентацијата на Велика Британија во синхронизирани скокови во вода од 10 метри на ЛОИ во Токио направи сензација и стигна до златниот медал.
Сè уште влажен од базенот, сè уште со ококорени очи во неверување дека го освоија олимпиското злато со неговиот нуркачки партнер Мети Ли, 13 години од неговите први Игри, Том Дејли сепак имаше време за уште еден монументален, личен момент.
За Дејли ова беше исто така многу јавен момент на исполнетост, по освојувањето на бронзените медали во Лондон и Рио, период кој се совпадна со стапувањето во брак со филмскиот продуцент Дастин Ленс Блек и раѓањето на нивниот син Роби.
„Неверојатно сум горд што сум геј маж и исто така и олимписки шампион. Кога бев помлад, не мислев дека некогаш ќе постигнам нешто поради тоа што бев. Да се биде олимписки шампион сега само покажува дека можеш да постигнеш што било“, самоуверено рече Дејли.
Во сјајот на победата, тој со зачудувачка јасност зборуваше за притисоците со кои се соочил во текот на животот што живеел под будното око на љубопитната јавност.
„Во поглед на спортисти кои се јавно произнесени како геј, на овие Олимписки игри има најмногу спортисти кои се аутирале од сите Олимписки игри досега. Јас се аутирав во 2013 година и кога бев помлад секогаш се чувствував како некој кој е сам, и различен, и не се вклопува. Имаше нешто во мене што никогаш немаше да биде онолку добро како што сакаше општеството. Се надевам дека секоја млада ЛГБТИ личност каде било, може да види дека колку и да се чувствувате сами во моментов, не сте сами. Можете да постигнете сè“.