Карим Бензема синоќа после шест години повторно го облече францускиот дрес, имаше одлична прилика да постигне гол, но славјето му го расипа противничкиот голман.
Алжирецот роден во Франција стана репрезентативец уште во 2007 година кога имаше 19 години. Настапи на ЕУРО 2008 и 2012, како и на Мундијалот 2014, а потоа наредната година беше избришан од репрезентацијата токму од селекторот Дидје Дешан, по што почна медиумска војна која ја продолжи и во 2018 кога повторно беше изоставен од патниците за Мундијалот кој Франција потоа и го освои.
Сега ги закопаа секирите, па Бензема на 33 години е вратен во репрезентацијата и ќе настапи на претстојното ЕУРО.
Франција синоќа во Ница одигра пријателски натпревар против Велс на кој од првата минута играше Бензема, прв пат по есента 2015 година. Во 27. минута Французите добија удар од белата точка по играњето со рака на Неко Вилијамс, а Бензема ја доби честа да го изведе и да го постигне својот прв репрезентативен погодок по оние два гола на пријателска против Ерменија на 8 октомври 2015.
За Бензема да нема славно враќање се погрижи велшкиот голман Дени Ворд кој одлично го прочита неговиот удар.
Ворд е резерва во Лестер и откако е во клубот, три години, нема ниту еден настап во Премиер лигата бранејќи единствено во куповите. Сезонава собра вкупно 5 настапи.
Бензема го одигра целиот натпревар и не успеа да се запише во листата на стрелци, но му асистираше на Усман Дембеле при последниот гол за конечните 3:0.
Нова шанса за гол ќе има на наредната пријателска кога на осми во Париз ќе гостува Бугарија.
