11 години по лансирањето, играта никогаш не билa попопуларна.
Додека позитивните критики за Hogwart's Legacy доаѓаат од сите страни, лесно е да се помисли дека овој наслов е на врвот на листата на најиграни игри на платформата Steam. Сепак, не само што не е така, туку на првата позиција се наоѓа игра стара дури 11 години - Counter-Strike: Global Offensive - која денес е попопуларна од кога било.
Според базата на податоци на SteamDB, мултиплеер играта која беше објавена на 21 август 2012 година, го собори својот рекорд за најмногу истовремени играчи во текот на викендот - 1.320.219. Исклучително импресивна бројка имајќи предвид дека оригиналниот Counter-Strike започна како мод за Half-Life во 1999 година.
CS:GO е единствената игра на платформата Steam која редовно регистрира над милион истовремени играчи, додека популарниот MOBA наслов, Dota 2, долго време цврсто ја држи втората позиција. Сепак, таа позиција во моментов е под сериозна закана од Hogwart's Legacy, игра која беше лансирана минатата недела.
И покрај популарноста, „Кантер“ не е игра со најмногу истовремени играчи досега. Всушност, таа титула му припаѓа на хит насловот PUBG: Battlegrounds, кој претходно го постигна најдобриот резултат од 3.257.248 истовремени играчи. Над CS:GO е и Lost Ark, која успеа да собере уште околу 5.000 играчи истовремено. Освен игрите PUBG, Lost Ark и CS:GO, само Dota 2 и Cyberpunk 2077 успеаја да постигнат број на истовремени играчи над милион.
Растот на гејмерите кои играат популарни наслови во исто време е во согласност со растот на бројот на луѓе кои користат Steam. Во јануари, бројот на корисници на платформата - кои играле видеоигри во исто време - достигна 10.284.568, додека бројот на истовремено најавени корисници достигна 33.078.963.
