Археолози од Универзитетот во Ерусалим и од Универзитетот во Тел Авив со години анализираа делови од коски откриени во 2010 година во Нешер Рамла, југоисточно од Тел Авив.
Коските се пронајдени во израелски каменолом, а се стари меѓу 120.000 и 140.000 години. Научниците ги споредувале со стотици фосили од светот кои потекнуваат од различни периоди и откриле дека овие фрагменти веројатно припаѓаат на досега непознат вид луѓе кои се блиско поврзано со неандерталците и со нив делат заеднички карактеристики.
Овој нов подвид научниците го нарекоа нешер рамла, пишува Times of Israel. Живееле покрај хомосапиенс повеќе од 100.000 години и веројатно се вкрстиле со нашиот вид, сметаат научниците. Овие рани луѓе кои имале многу големи заби и немале брада (во анатомска смисла), можеби исто така биле предци на неандерталците.
Експертите сметаат дека постојат доволно сличности овие луѓе да се поврзат со останатите популации стари и до 400.000 години пронајдени во ископините низ пештери во Израел.
„Морфологијата на луѓето Nesher Ramla споделува карактеристики и со неандерталците (особено забите и вилицата) и со архаичниот хомо (черепот). Истовремено, овој вид луѓе е многу различен од современите луѓе, има целосно поинаква структура на черепот, многу големи заби и нема брада, изјавија научниците.
Веруваат дека овој вид се парел со хомосапиенс, којшто на тоа подрачје пристигнал пред 20.000 години.
Ова ново истражување ги потврдува претходните студии кои покажуваат дека хомосапиенс и неандерталците се поклопиле на Блискиот Исток во текот на значаен временски период, веројатно на неколку десетици илјади години.
Истражувањето „Middle Pleistocene Homo behavior and culture at 140.000 to 120.000 years ago and interactions with Homo sapiens“ е објавено во Science.