Бидејќи сѐ уште нема јасен став од Министерството за здравство, а крајниот рок на УЕФА полека наближува, ФФМ и десетте прволигаши в понеделник ќе одржат состанот на кој ќе ги разгледаат опциите.
УЕФА бара од своите членки до 25 мај да донесат конечна одлука дали ќе ги продолжат своите првенства или ќе се прогласи дефинитивен крај. Во Македонија сѐ уште нема дефинитивен став по ова прашање од страна на надлежниот орган, односно Министерството за здравство од каде деновиве најавија дека од наредната недела ќе се дозволи одржување тренинзи на отворено.
„Натпреварувачката комисија во ФФМ постојано ги следи настаните поврзани со вонредната состојба во нашата држава и епидемиолошката состојба, а ФФМ како водечко фудбалско тело сѐ уште е во исчекување на препораките и мерките од координативниот кризен штаб за обезбедување целосна координација во врска со спречување на внесување и ширење на коронавирусот COVID-19 за евентуален почеток на тренинзите на фудбалските екипи. Токму од тие препораки и мерки ќе зависи евентуалното продолжување на националното фудбалско првенство, бидејќи веќе влегуваме во термини кои го загрозуваат доигрувањето на шампионатот“, велат од Фудбалската федерација на Македонија.
Состанокот со десетте прволигаши е закажан за понеделник од 13 часот.
„Се надеваме дека до понеделник, здравствените институции официјално ќе ги соопштат мерките и препораките и ФФМ заедно со клубовите ќе излезе со заеднички став за натпреварувачката сезона 2019/2020. Како федерација сме во постојан контакт со УЕФА и федерациите во регионот кои се соочуваат со слични предизвици со цел да се донесе правилна одлука за доброто на фудбалот и клубовите“.