На денешен ден во 2002 година македонската фудбалска репрезентација го забележа еден од најголемите успеси кога одигра нерешено на гости со Англија, а успехот го зачини неверојатниот гол од корнер на Шаќири.
Англија, предводена од познатиот шведски стратег Свен-Јоран Ериксон, важеше за огромен фаворит против Македонија. Натпреварот беше дел од квалификациите за ЕУРО 2004, а се играше на „Сент Мери“ стадионот во Саутемптон.
Во 11. минута Артим Шаќири изведе корнер од десната страна и на изненадување на сите упати удар директно во голот на легендарниот Дејвид Симан. Англискиот голман, познат по киксови, беше фатен неспремен за такво нешто и мораше да ја вади топката од мрежата.
Само три минути подоцна Дејвид Бекам израмни, но Македонија уште еднаш успеа да дојде во водство кога во 24. минута Ванчо Трајанов упати одличен удар по една одбиена топка.
За неверојатно прво полувреме полно со голови се погрижи уште една легенда, Стивен Џерард кој израмни на 2:2. До крајот немаше промени, Македонија освои бод на Островот, а натпреварот остана во вечно сеќавање на секој македонски фудбалски вљубеник.
За Македонија настапија: Петар Милошевски; Роберт Попов, Гоце Седлоски (к), Александар Васоски, Роберт Петров; Величе Шумуликоски, Александар Митрески, Ванчо Трајанов (90'+3 Милан Стојаноски); Артим Шаќири, Гоце Толески (62' Горан Пандев), Влатко Грозданоски. Селектор беше Никола Илиевски.
За Англија настапија: Дејвид Симан; Гари Невил, Џонатан Вудгејт, Сол Кембел, Ашли Кол; Вејн Бриџ (58' Дариус Васел), Пол Сколс, Стивен Џерард (55' Ники Бат), Дејвид Бекам (к); Алам Смит, Мајкл Овен.
Голот на Шаќири стави и печат на репрезентативната кариера на Симан. Тоа му беше последен настап во репрезентацијата бидејќи после тој корнер селекторот Ериксон направи смена помеѓу стативите ставајќи го Дејвид Џејмс.