На денешрен ден во 1990 година се играше натпреварот од отворањето на Светското првенство во Италија помеѓу шампионот Аргентина со Марадона и аутсајдерот Камерун.
На преполниот „Џузепе Меаца“ во Милано публиката очекуваше лесна и убедлива победа на „Гаучосите“, неутралните Италијанци навиваа за Африканците. Предводени од Диего Марадона, со Оскар Ружери, Нестор Сенсини, Хорхе Буручага, Абел Балдо, Клаудио Каниџа, шампионот од 1986 беше апсолутен фаворит.
Од 61. минута Камерунците беа и со играч помалку откако Андре Кана-Бијик заработи директен црвен картон. Но, само 6 минути подоцна неверување кај фудбалската јавност. По едно нафрлување од слободен удар топката се одби и паѓајќи пред голот ја начека Франсоа Омам-Бијик кој со небесен скок со глава ја пикна во мрежата на Нери Пумпидо.
Марадона и дружината не успеаја никако да го скршат отпорот на африканскиот тим и на свој грб го запишаа веројатно најголемото изненадување во историјата на светските првенства.
Аргентина потоа успеа да стигне до финалето каде со гол од пенал загуби од Западна Германија, додека Камерун иташе до четвртфиналето каде доживеа елиминација од Англија. До ден денес тоа е најголемиот успех на Камерун на Мундијалите. Генерацијата на Роже Мила, Тома Н'Коно, Емануел Кунде, Франсоа Омам-Бијик, Бенжамен Масињ, Емил М'Бу, Сирил Маканаки, Андре Кана-Бијик останува како најдобрата во својата историја.
