На 31 август 1997 година се случи дебито во дресот на Интер на тогаш најдобриот играч во светот, бразилскиот Роналдо, но падна во сенка на еден млад и анонимен Уругваец - Алваро Рекоба.
Тоа неделно пладне црно-сината страна на Милано беше во еуфорија - на „Џузепе Меаца“ за прв пат на официјален натпревар ќе истрчаше големото засилување кое претседателот Масимо Морати им го подари на навивачите - Луис Назариу џи Лима Роналдо, кој за тогаш рекордни 27 милиони долари дојде од Барселона.
Пред 70 илјади нестрпливи гледачи, Интер предводен од Џиџи Симони истрча со Џанлука Паљука на голот, во одбраната Џузепе Бергоми, Хавиер Занети, Луиџи Сартор и Фабио Галанте, во средината Арон Винтер, Диего Симеоне, Франческо Мориеро и Јури Џоркаеф, а во нападот Маурицио Ганц со човекот на денот - Роналдо.
Противникот беше Бреша, чиј тренер Џузепе Матераци изваде храбра формација со двајца напаѓачи - легендите на Серија А, Емилиано Бонацоли и Дарио Хубнер.
И покрај надмоќноста, Интер не успеаваше да го совлада Џовани Червоне, а Роналдо или го промашуваше голот, или Червоне му бранеше. Во 73. минута се случи студен туш: голгетерот Хубнер на асистенција од младиот Андреа Пирло го замолкна „Меаца“ - Бреша води 0:1 на дебито на феноменот Роналдо. Само минута пред тој гол Интер ја направи првата измена, а во игра влезе 21-годишниот Алваро Рекоба на местото на Ганц.
Со бројот 20 на грбот, косоокото момче дојдено тоа лето од уругвајски Насионал, во 80. минута со топовски удар со лева најде начин како да го совлада тој ден одличниот Червоне и израмни на 1:1.
Само пет минути подоцна слободен удар за Интер на 30-ина метри од голот на гостите. Се мести младиот Рекоба, шутира со лева во левиот горен агол и Червоне повторно капитулира, а публиката е во делириум.
Така, 70 илјади гледачи што дојдоа да го слават бразилскиот виртуоз Роналдо станаа на крајот громогласно да го поздрават младиот Уругваец кој му ја украде славата на Роналдо. И за него ова беше деби.
Интер таа сезона заврши втор, зад шампионот Јувентус, а Рекоба одигра само 8 натпревари на кои постигна 3 гола и двапати асистираше. Роналдо на 32 натпревара во Серија А постигна 25 гола и трипати асистираше, а беше втор најдобар стрелец во лигата зад Оливер Бирхоф со 27 гола за Удинезе. Бреша за малку не се спаси и испадна, бод заостануваше зад Виченца и два зад Емполи и Пјаченца.
