Напаѓачот на Јувентус Пауло Дибала вербално го нападнал директорот на клубот Фабио Паратичи по нерешениот резултат 1:1 против Кротоне, според Tuttosport.
Според италијанскиот медиум, Дибала не бил задоволен што воопшто не учествувал на натпреварот, останувајќи на клупа на сметка на „помладите“, па упатил жестоки критики кон Паратичи во „тунелот“ кон соблекувалната по мечот.
На неговата прес-конференција по натпреварот, тренерот Андреа Пирло рече дека не го пуштил Дибала да игра затоа што тренирал со тимот само 10 минути и натпреварот не бил погоден за тој да се појави на теренот.
Како што е познато, Аргентинецот не играше на последните два меча за репрезентацијата, бидејќи страдал од гастроентеритис. Досега тој нема одиграно ниту една минута во сезоната, откако пред тоа имаше повреда на бутот.
Дибала требаше да биде стартер на „Старата дама“ против Наполи, но натпреварот не се одигра. Сепак, тој најверојатно ќе учествува на натпреварот против киевски Динамо во Лигата на шампиони.
Покрај тоа што се скара со Паратичи, Дибала „лајкна“ објава на италијански новинар кој го критикуваше Пирло за неговата одлука да не смета на Аргентинецот на синоќешниот натпревар.
