Калчолигашот кој ги освои симаптиите ширум светот со необичните, но кул дресови, сега ги отвора вратите за секој што сака да стане инвеститор.
Сте си помислиле ли како би било да сте инвеститор во фудбалски клуб? Епа, сега имате шанса. Венеција ги повика фудбалските фанови од целиот свет да ја искористат шансата и да се стекнат со обврзници издадени од клубот кој доаѓа од еден најисториските градови на планетава.
Испаѓањето од Серија А можеби малку ги наруши амбициозните планови на малиот клуб од некогашната средновековна Република Венеција, но клускиот амблем и натаму ќе се вее низ многубројните канали на бајковитиот град на Јадранското Море.
Компанијата Tifosy Capital & Advisory, која соработува со фудбалскиот клуб Венеција, е специјализирана за алтернативни решенија за собирање капитал. Токму таа ја врти новата страница во сега веќе членот на Серија Би.
Од Tifosy Capital & Advisory објавија соопштение во кое објаснуваат на кој начин ќе бидат потрошени средствата инвестирани од новите инвеститори. Нормално, ништо од ова не е багатела, па секој заинтересиран потенцијален инвеститор треба да направи инвестиција од минимум 1.000 евра. Компанијата претходно му помогна на шкотскиот гигант Ренџерс да се врати на старите патеки, а соработува и со Интер, Јувентус, Манчестер Јунајтед и Норич. Интересно, коосновач на Tifosy Capital & Advisory е поранешниот голгетер Џанлука Виали.
„Веќе започна работата на развојот на новиот тренинг-центар, а сопствениците ќе ги обезбедат сите средства во моментот кога ќе веруваат дека клубот достигнал финансиска стабилност. Како што клубот преминува во нова фаза фокусирана на долгорочната иднина, сопствениците сега ги покануваат поддржувачите на Венеција, нејзината локална и глобална заедница и сите инвеститори, да инвестираат во Venezia FC Bond заедно со клубот. Средствата собрани од Venezia FC Bond директно ќе ја финансираат изградбата на новиот тренинг-центар во Талиерчо. Зградата ќе вклучува дополнителни терени за тренинзи, соблекувални, теретана, медицински и рехабилитациони објекти и новото седиште на клубот“.
Оние кои ќе изберат да се вклучат и да станат инвеститори ќе добиваат 7,5% камата годишно на нивниот удел, додека 15% паричен бонус ќе биде исплатен доколку клубот се врати во Серија А во рокот на која било дадена обврзница.
